كيف تخطط لاهدافك وتحققها فعلاً؟

"2023 بدأت .. ألحق أعمل لنفسي قائم كتب وكورسات ومن أول 1/1 هصحى الساعة 5 الفجر وأبقى من نادي الخامسة صباحًا"

يا ترى عندنا كام جدول عملناه كان بادئ بحماس لكن للأسف ممشيناش عليه؟ 🤔

وقد إيه كان نفسنا نحفظ قرآن .. نقرأ .. نحسن نفسنا في لغة معينة أو نتعلم لغة جديدة؟ 

ده حتى اليوتيوب يشهد على كمية الڤيديوهات اللي عاملينلها watch later عشان مهمة ولحد دلوقتي مشوفنهاش. 

تعدي سنة ورا  سنة واحنا لسة بنستنى السنة الجديدة عشان تبدأ صفحة جديدة .. رغم إن صفحة السنة القديمة لسة فاضية .. 

مُعضلة الجدول والقرارات اللحظية اللي بتضغط بيها نفسك أكبر بكتير من كونها كلام بتقوله لنفسك أو بتكتبه على الورق .. 

عمرك فكرت أنا بحط جدولي على أساس إيه؟ 

تعالى نفكر سوا🙋🏻‍♀️

أنا وأنت بنحط الجدول على أساس الشغف اللي عندنا والحاجات اللي عايزين نعملها ونتعلمها.. 

لو عندك شغف إنك تتعلم مهارة جديدة أو لغة جديدة .. وفي نفس الوقت وراك شغل أو دراسة ووراك قراءة وترتيب أوضتك وعنايتك بنفسك ووراك podcast مهم هيفرق معاك جدا وكمان عندك كورس لازم تشوفه عشان هيفيدك في شغلك... و و و ... 

تفتكر أغلبية الناس في وضع زي ده بتعمل إيه؟ 

أغلبية الناس بتقسم وقتها وعلى الأساس ده بتعمل الجدول .. 

بمعنى .. أنا هحط لنفسي نص ساعة أو ساعة أتعلم اللغة .. وآه عندي ساعة هتروح في الأكل والشرب .. وكمان عندي بريك نص ساعة .. وعندي محاضرة مهمة لازم أحضرها والسكة أدي ٤ ساعات .. أو عندي شغل برجع منه ٨ بليل يبقى هريح نص ساعة وأذاكر اللغة من ٨:٣٠ ل ٩:٣٠ .. وكمان هتفرج على فيديو ساعتين .. وأريح شوية .. وبعدين هقرا وفي الآخر هنام. 

تقييمك لساعاتك اللي هتستهلكها لوحده غلط .. لأن ببساطة مش كل الناس بتنفع معاهم نفس الطريقة .. 

أول حاجة عشان تقدر تمشي بيوم منظم وتبني عادات جديدة إضافة ليومك لازم تراقب يومك 👀

يا ترى وقتك بيروح في ايه؟ 

وعشان كدة لازم تبدأ تعمل الآتي:

1- ادي نفسك أسبوع تشوف الحاجة الجديدة اللي عايز تعملها دي محتاجة منك وقت يوميا قد إيه .. فبدل ما تدي لنفسك نص ساعة أو ساعة تتعلم أو تقرأ .. ادي نفسك أسبوع شوف تعلم الحاجة الجديدة أو القراءة محتاجة منك وقت قد إيه عشان يكون في استيعاب واستفادة .. 📆

2- ابعد عن المشتتات وقت ما لازم تركز. 

التليفون .. التليفزيون .. وأي حاجة ممكن تشتت تركيزك. 🤳🏻

3- متعملش جدول مضغوط على الفاضي .. ولا تحاول تخلص حاجة بسرعة وأنت لسة مستفدتش عشان تبدأ في اللي بعدها .. 🤯

4- ظبط نومك .. عشان تقدر تصحى بدري وتنجز مهام أكتر ضروري إنك تدي جسمك فرصة يتعود واحدة واحدة .. يعني كل يوم حاول تصحى بدري شوية ١٠ دقايق! 🛏️

5- اعمل الجدول على أساس استهلاكك الحقيقي مش اللي أنت متوقعه 📉

6- جدولك لازم يكون شامل لحياتك الاجتماعية .. 

أهلك .. صحابك .. جيرانك.. 

7- شجع نفسك وكافئ نفسك دايما على كل يوم أنجزت فيه ولو حاجة واحدة المهم إنها بضمير 🤝🏻

8- لازم تشرب ماية .. 

طب وإيه علاقة الماية دلوقتي؟🤔

عشان تبقى نشيط ومركز ومتحسش بضيق مفاجئ حقيقي الماية مهمة جدا من أول ما تصحى من النوم لحد ما تيجي تنام تاني!

9- متخليش أول حاجة تبص فيها لما تصحى التليفون ولا تخليه آخر حاجة! (هنتكلم عنه لوحده)

10- وأخيرًا متخليش جسمك يتعود على القهوة أول ما تصحى.. خليه يفوق طبيعي وبعدين أبقى أشرب قهوتك. 💯

يمكنكم مشاهدة هذا الفيديو لمساعدتكم في التخطيط وتحقيق أهداف هذة السنة